Gwobrau Prentisiathau 2024

Dechreuodd Alice Davies ar gwrs nyrsio milfeddygol yn ystod cyfnod heriol y pandemig Covid-19, a dangosodd ei hymrwymiad trwy gwblhau ei holl asesiadau ar-lein, a hynny i safon uchel.

Wedi iddi weithio’n galed i addasu i’r sefyllfa newidiol, cymhwysodd Alice fel Nyrs Filfeddygol Gofrestredig gyda merit, gyda’i swyddog hyfforddi’n dweud ei bod wedi bod yn “bleser gwirioneddol” i’w haddysgu.

Disgrifiodd ei chydweithiwr a’i mentor yn Cater Vets, Amy Revell, Alice fel “RVN eithriadol”, gan ddweud bod ei hyder a’i gwybodaeth wedi tyfu o ganlyniad i’w hymroddiad a’i hangerdd trwy gydol cyfnodau anodd a heriol.

Mae’n gweithio fel eiriolwr ar gyfer ei chleifion a’i chydweithwyr, yn dod â sirioldeb a phositifrwydd i’r practis ac yn ffynnu wrth nyrsio anifeiliaid yn ôl yn iach yn dilyn llawdriniaeth a salwch.

Ers iddi gymhwyso, mae Alice wedi parhau i geisio heriau newydd ac i wella ei gwybodaeth er budd y cleifion.

Disgwylir bethau mawr i Carys Beamish sydd wedi cymhwyso fel Nyrs Filfeddygol Gofrestredig yn Cibyn Vets yng Nghaernarfon.

Er ei hymagwedd hamddenol tuag at adolygu, mae’n amlwg yn adnabod ei phwnc gan ei bod wedi cyflawni dros 90% ym mhob un o’i chanlyniadau arholiad ysgrifenedig, gyda’i haseiniadau wedi eu cwblhau i safon uchel.

Bu’r gefnogaeth gan y practis a’i swyddog hyfforddi yn gymorth iddi i adeiladu ei hyder yn ei sgiliau ymarferol, ac fe gwblhaodd ei chymhwyster gyda merit.

Disgrifir Carys fel ychwanegiad gwych i’r tîm milfeddygol sy’n nodi ei hagwedd bositif, ei hagwedd wych tuag at waith a’i pharodrwydd i gymryd cyfrifoldeb ac i helpu cydweithwyr.

Mae ganddi ddiddordeb mewn maeth, mae wedi cyflawni llwyddiannau gydag anifeiliaid anwes yn colli pwysau mewn clinigau pwysau, a hi yw’r nyrs i fynd ati ar gyfer microsgopeg. Dywedodd y prif nyrs filfeddygol Cherise Hunt fod “Carys yn sicr o fynd ymlaen i wneud pethau mawr, ond mae’n nyrs filfeddygol gymwys gwych yn barod.”

Mae Alex Anwyl wedi gallu jyglo bywyd teuluol, gwaith ac astudio i gymhwyso fel Nyrs Filfeddygol Gofrestredig yn Rhianfa Vets, Y Rhyl, ble derbyniodd brofiad ymarferol cyn hynny.

Roedd ei phrofiad blaenorol yn help iddi wrth fynd i’r afael â’r llwyth gwaith ac fe weithiodd yn agos gyda’r prif filfeddyg a pherchennog y clinig i weithredu strategaethau newydd . Erbyn hyn mae’n helpu myfyrwyr nyrsio eraill i wireddu eu breuddwydion yn y clinig.

Mae ei diddordeb yn y gwyddorau meddygol anifeiliaid diweddaraf wedi dod â’r protocolau diweddaraf i’r practis ac mae wedi ymgeisio i Brifysgol Glasgow i astudio ar gyfer MSc Ymarfer Uwch mewn Nyrsio Milfeddygol.

Disgrifiodd John Hickerton o Rhianfa Vets Alex fel “rhan gwerthfawr” o’r tîm, gan ganmol ei thosturi, ei charedigrwydd, ei hamynedd, ei gwybodaeth, a’i gofal o’r anifeiliaid a’r cleientiaid.