Gwobrau Prentisiathau 2024

Mae’r swyddog canolfannau Undeb Rygbi Cymru, Christopher Meyers, wedi defnyddio’r sgiliau enillodd ar Brentisiaeth Uwch (Lefel 5) mewn Arweinyddiaeth a Rheolaeth i wneud rygbi’n fwy hygyrch i bobl ifanc.

Datblygodd Chris ei sgiliau ar draws gwahanol sectorau tra’n sicrhau fod disgyblion Ysgol Emrys Ap Iwan, Abergele yn cael profiadau o safon sydd wedi eu gwreiddio mewn rygbi a dadansoddi data.

Roedd ei waith yn hyrwyddo cydraddoldeb, amrywiaeth a chynhwysiant yn mynd i’r afael â chyfranogiad merched a rygbi hygyrch i gadeiriau olwyn yn yr ysgol ac o fewn y clwb y mae’n ei reoli.

Sicrhaodd hefyd fod mwy o lwybrau dysgu a datblygiad ar gael i gefnogi gwirfoddolwyr i’r clwb.

Mae Chris wedi datblygu perthnasau positif gyda’i holl randdeiliaid ac mae’n benderfynol i ddefnyddio ei sgiliau arwain a rheoli i ddod a rygbi i fywydau mwy o bobl. Roedd ei holl waith yn yr ysgol yn cyd-fynd â newidiadau i gwricwlwm yr ysgol.

Mae Prentisiaeth Uwch (Lefel 4) mewn Rheolaeth wedi helpu Lorraine Orger i gynyddu ei gwybodaeth a’i hyder yn ClwydAlyn, landlord cymdeithasol sy’n rheoli dros 6,200 o gartrefi yng Ngogledd a Chanolbarth Cymru.

Wedi iddi gael ei dyrchafu fel cadeirydd y fforwm staff, fe helpodd Lorraine i gyflwyno prosesau adnoddau dynol newydd a, gyda chydweithiwr, creu cystadleuaeth i gael syniadau gan staff ynghylch arbedion effeithlonrwydd.

“Mae hyder Lorraine wedi cynyddu gyda’i gwybodaeth ac rydym i gyd yn gweld faint mae hi wedi tyfu a datblygu yn y blynyddoedd diwethaf,” meddai ei rheolwr llinell, Rachel Storr Barber.

Yn ogystal â’i swydd, trefnodd Ddyddiau Hwyl ClwydAlyn am ddwy flynedd, ac hefyd i becynnau fflagiau, cwpanau, baneri a balwnau gael eu rhannu i gartrefi gofal y cwmni a phrosiectau allanol i ddathlu Jiwbilî Platinwm y Frenhines yn 2022.

Nid oedd gan Mel Davis unrhyw gymwysterau ffurfiol pan ddechreuodd hi ar ei thaith dysgu yn 2017, gyda Phrentisiaeth Uwch (Lefel 4) mewn Cyngor ac Arweiniad, a cafodd ei hasesu fel bod yn dyslecsig. Addasodd Grŵp Llandrillo Menai asesiadau i siwtio ei dull dysgu ac nid yw Mel wedi edrych yn ôl wedi hynny.

Mae ei hymrwymiad i ddysgu ac i’r bobl mae’n eu cefnogi yng Nghanolbwynt Cyflogaeth Conwy wedi ennill gwobr prentisiaeth i Mel yn 2019. Ers hynny, mae wedi cwblhau cymwysterau Lefelau 3, 5 a 7 mewn cwnsela, hyfforddi a mentora a Diploma Lefel 4 mewn rheoli prosiect.

Mae hefyd wedi dylunio rhaglen hyfforddi unigryw o’r enw 'Confidently you' i gefnogi pobl i adeiladu eu hyder a’u sgiliau cymdeithasol ac wedi sicrhau cyllid gan y Llywodraeth i ehangu’r rhaglen sydd wedi newid bywydau.

Wedi ei dylunio’n wreiddiol i gefnogi 30 o bobl, mae’r rhaglen wedi cefnogi 60 sydd wedi ffurfio eu rhwydwaith cefnogaeth cymunedol eu hunain a llawer ohonynt wedi dod o hyd i gyflogaeth.