Gwobrau Prentisiathau 2024

Mae Donna Pugh-Jones wedi ei thrawsnewid o ddynes cinio i gymhorthydd dysgu hyderus a rhagweithiol yn Ysgol Santes Fair yng Nghaergybi, wedi iddi gwblhau Prentisiaeth mewn Cefnogi Addysgu a Dysgu mewn Ysgolion.

Gyda chefnogaeth gan ei thiwtor a staff yr ysgol, mae hi wedi datblygu cariad tuag at ddysgu, yn enwedig mathemateg a sgiliau digidol, ac mae hi erbyn hyn yn gwneud defnydd da ohonynt yn y dosbarth i gefnogi disgyblion.

Mae hi wedi ysbrydoli eraill i ymgymryd â’r cymhwyster yn yr ysgol ac mae ei holl gydweithwyr yn canmol ei hagwedd gadarnhaol.

Mae Donna’n cyfaddef fod y cymhwyster wedi bod yn brofiad anghyfarwydd iddi, wedi rhoi hwb i’w hunan-hyder ac wedi rhoi ystod eang o sgiliau iddi y mae hi bob amser yn awyddus i’w rhannu.

Ymunodd Ceri Tait ag Ysgol Maes Y Felin fel cymhorthydd dysgu ar ddechrau 2022 ac mae’n gweithio tuag at Brentisiaeth Cefnogi Addysgu a Dysgu mewn Ysgolion.

Oherwydd bod Ceri yn dyslecsig, mae ei rhaglen ddysgu wedi ei haddasu gan ei thiwtor i siwtio ei hanghenion. Mae’n darparu cefnogaeth un i un ar gyfer dau ddisgybl ac wedi datblygu perthynas dda gyda nhw a’u rhieni.

Mae’n frwdfrydig ac ymroddgar, mae’n gwneud popeth y gallai i gefnogi ei chydweithwyr a’i disgyblion. Mae’n hyfforddi tîm pêl-droed genethod ar y penwythnosau ac yn cefnogi gweithgareddau ar ôl yr ysgol ar gyfer y plant.

Disgrifiai’r pennaeth, David Thomas, Ceri fel aelod allweddol o’r staff, model rôl gwych a chymhorthydd dysgu effeithiol iawn.

Ymunodd Eboney Riordan ag Ysgol Maesglas fel cymhorddydd dysgu o’r rhaglen Twf Swyddi Cymru Plws gan gyflawni cymwysterau Lefelau 1 a 2 mewn Hyfforddiant Chwaraeon ac ennill gwybodaeth bwysig am weithio mewn ysgolion.

Disgrifir hi fel person tawelgar, gofalgar a phroffesiynol, mae wedi dangos gwytnwch wrth ddelio â sefyllfaoedd heriol, rhywbeth nodwyd gan arolygydd Estyn. Mae Eboney yn gweithio tuag at Brentisiaeth Sylfaen mewn Cefnogi Addysgu a Dysgu mewn Ysgolion erbyn hyn.

Dywed Gill Lloyd o Ysgol Maesglas fod Eboney wedi profi ei bod yn hyblyg, gweithgar, yn awyddus i ddysgu a gwella ac yn fedrus wrth feithrin perthnasoedd cryf gyda chydweithwyr a disgyblion fel ei gilydd.