Gwobrau Dysgu Seiliedig ar Waith Gogledd Cymru 2025

Mae’r cyn-ddiffoddwr tân Timothy Dykins wedi cynnau gyrfa newydd yn y proffesiwn gofal iechyd ble mae wedi ei nodi am ei waith caled, ei ymroddiad a’i dosturi.

Mae Timothy yn Weithiwr Cefnogol Gofal Iechyd yn Ysbyty Gymunedol Treffynnon, rhan o Fwrdd Iechyd Prifysgol Betsi Cadwaladr, ble mae wedi cwblhau Prentisiaeth Sylfaen mewn Gofal Iechyd Clinigol o flaen ei amser.

Mae nawr yn symud ymlaen i Ddiploma Lefel 3 ac yn gwella ei sgiliau cyfathrebu drwy ddysgu Iaith Arwyddion Prydain yn y coleg yn ei amser ei hun.

Fel y pencampwr rheoli heintiau ar gyfer ei ward, mae Tim yn chwarae rôl hanfodol i gynnal iechyd a diogelwch cleifion a staff ac yn helpu i adsefydlu cleifion i adennill eu nerth a’u hannibyniaeth er mwyn iddynt allu dychwelyd adref.

Mae’r gwneud cyfraniad pwysig i ofal sy’n canolbwyntio ar y claf yn yr ysbyty a, gyda’i angerdd i ddysgu, mae’n fodel rôl positif.

Mae Jade Botha ar y ffordd i yrfa fel nyrs filfeddygol yng Ngrŵp Practis Milfeddygol Bodrwnsiwn yng Ngogledd Cymru.

Gweithiodd yn ddiwyd i gwblhau Diploma Cymhorthydd Nyrsio Milfeddygol Lefel 2 gyda graddau uchel, ac mae wedi symud ymlaen erbyn hyn i Ddiploma Lefel 3 mewn Nyrsio Milfeddygol.

Disgrifiodd tiwtor Jade hi fel “disglair a dymunol” a chyda meddwl chwilfrydig wrth iddi dreiddio’n ddyfnach am well dealltwriaeth o’r wybodaeth. Mae’n gweithio’n galed mewn lleoliad clinigol i sicrhau bod profiad ymarferol yn cefnogi ei gwybodaeth ddamcaniaethol.

Yn aelod annatod o’r tîm, sy’n gweithio’n galed, symudodd Jade yn ddi-dor i mewn i’r Prentisiaeth Nyrsio Milfeddygol gydag angerdd o’r newydd a dywedir bod ei meddwl ymholgar yn heintus.

Mae Jade yn gosod safonau uchel yn ei gwaith ei hun a’r cleifion sydd yn ei gofal.

Cafodd Naganarayanan Ramamoorthy ei ddyrchafu i safle rheolaeth iau yng ngwesty’r St George’s Hotel, Llandudno wedi cwblhau Diploma Lefel 2 City & Guilds mewn Cynhyrchu Bwyd a Choginio dri mis yn fuan.

Dechreuodd ar ei Brentisiaeth Sylfaen ym mis Medi, 2023, wedi symud i Gymru o Sawdi Arabia ar ei ben ei hun gyda’r nod o gaffael gwybodaeth a phrofiad ar gyfer gyrfa yn y celfyddydau coginio.

Mae Naganarayanan wedi arddangos ymrwymiad diwyro i’w gymhwyster, gan ddangos lefel gyson uchel o broffesiynoldeb, bob amser yn awyddus i ddysgu ac yn gofyn am aseiniadau ychwanegol yn rheolaidd i herio ei hun.

Er ei fod yn bell oddi wrth ei deulu yn India, a chyfleoedd i ymweld yn brin, mae Naganarayanan wedi creu argraff ar ei brif gogydd a’i gydweithwyr gyda’i ymroddiad i ddysgu, i wneud cynnydd ac i gefnogi eraill.

Disgrifiai ei diwtor ef fel model rôl ar gyfer prentisiaid y dyfodol sy’n dilyn llwybrau tebyg.

Mae Ryan Wood yn ŵr ifanc sydd ar genhadaeth i ddatblygu gyrfa foddhaus a heriol yn y byd digidol.

Yn dilyn ei Lefel A, sicrhaodd swydd gydag Ap-Prentis a arweiniodd i leoliad gwaith yn Ysgol Uwchradd Argoed fel technegydd TGCh fel rhan o Brentisiaeth Sylfaen mewn TGCh, y Wê, Meddalwedd a Telathrebu.

Gwnaeth Ryan argraff ar ei diwtor gyda’i weledigaeth glir o’r llwybr roedd angen iddo ei gymryd i sicrhau y Prentisiaeth Gradd mewn Diogelwch Seibr y mae’n ei wneud erbyn hyn gyda Grŵp Llandrillo Menai mewn partneriaeth gyda Phrifysgol Bangor.

Yn ystod ei leoliad ysgol, cefnogodd gannoedd o fyfyrwyr ac athrawon, gan atgyfnerthu ei wybodaeth o fodelu data a meddalwedd cronfa ddata yn y broses.

Disgrifiai diwtor Ryan ef fel esiampl gwych o’r talent digidol sydd ar gael yng Ngogledd Cymru ac mae’n wych ei fod yn datblygu ei yrfa yn y rhanbarth.

Mae hyder, gwybodaeth a sgiliau Sadie Gittins wedi blodeuo ers iddi gwblhau Prentisiaeth Sylfaen mewn Gwaith Chwarae yng Nghlwb Plant Mynydd Helygain.

Gyda chefnogaeth ei thiwtor a’i chyflogwr, mae wedi trawsnewid o fod yn berson ifanc oedd yn ansicr am ei galluoedd academaidd ac ofn methu i fod yn aelod gwerthfawr a hyderus o’r tîm.

Wedi cwblhau ei chymhwyster, sicrhaodd Sadie rôl rhan-amser fel cymhorthydd dysgu yn yr ysgol ar y cyd â’i gwaith fel gweithiwr chwarae gyda’r clwb plant. Cafodd hefyd ei dewis gan ei chyflogwr i fentora’r dysgwr Lefel 2 nesaf.

“Mae Sadie yn dangos ymrwymiad cryf yn gyson i’w rôl ac â dealltwriaeth drylwyr o’i chyfrifoldebau,” meddai Gemma McLeod, uwch oruchwylydd, “Mae ei hymroddiad a’i chynnydd mewn hunan-sicrwydd wedi ei gwneud yn aelod amhrisiadwy o’n tîm.”