Gwobrau Dysgu Seiliedig ar Waith Gogledd Cymru 2025

Mae gan Gyngor Gwynedd ymrwymiad cryf i gefnogi prentisiaid i gwblhau eu cymwysterau yn y Gymraeg neu’n ddwyieithog. Nid yn unig mae eu hymroddiad i feithrin amgylchedd dwyieithog yn grymuso prentisiaid, mae hefyd yn cyfoethogi diwylliant y gweithle. Trwy annog y defnydd o’r iaith Gymraeg, mae Gwynedd yn hyrwyddo cynhwysiant ac yn gwella sgiliau’r genhedlaeth nesaf. Maent wedi dangos y ffordd drwy hyrwyddo’r iaith Gymraeg a chreu cyfleoedd sy’n ein hysgogi ni i gyd i lwyddo.

Cadi Morus-Partry, Uwch Swyddog Talent a Phrentisiaeth a chyn-brentis:

"Mae sicrhau bod prentisiaid yng Ngwynedd yn gallu ennill eu cymwysterau trwy’r Gymraeg yn hanfodol nid yn unig i’r unigolion ond i Gyngor Gwynedd fel sefydliad. Trwy ddarparu hyfforddiant trwy’r Gymraeg, rydym nid yn unig yn hyrwyddo’r defnydd o’r iaith ond hefyd yn creu amgylchedd mwy cynhwysol a chefnogol ar gyfer ein prentisiaid.”

Mae Aled Williams, rheolwr yn Seren Cyf, wedi dangos ymroddiad diflino’r cwmni i’w cyflogai a phrentisiaethau, gan greu amgylchedd gweithio sy’n annog twf, cynhwysiant, a chreadigrwydd i’w tîm o staff a’r unigolion maent yn eu cefnogi mewn lletygarwch.

Trwy ei arweinyddiaeth a’i ddiwylliant, mae Cwmni Seren Cyf nid yn unig yn rhagori fel busnes sy’n darparu cyfleoedd ar gyfer unigolion ag anableddau dysgu, mae hefyd yn gyflogwr rhagorol sy’n cefnogi aelodau’r tîm i ddatblygu a thyfu trwy gwblhau prentisiaethau Lefel 2 Iechyd a Gofal Cymdeithasol, ond hefyd i Lefel 3 a thu hwnt.

Mae Cwmni Seren Cyf wedi creu gweithle gyda Chymraeg yn greiddiol iddo. Mae Aled yn buddsoddi yn ei dîm a’r unigolion ag anableddau dysgu a gyflogir neu sy’n gwirfoddoli yn y cwmni. Mae’r cwmni hefyd wedi creu diwylliant ble mae’r cyflogai’n teimlo eu bod yn cael eu gwerthfawrogi, eu clywed a’u grymuso.